芊．媗遊世界: 7月 2016

2016年7月25日星期一

2016書展 - 文具篇

除左書包之外，今次媽咪話想係書展買文具，因為夠集中同多款選擇，有UNI，PENTEL，3M，PILOT，ZEBRA，STABILO，STAEDTLER，TOMBOW等等。。。媽咪話屋企D鉛筆雜牌，跌一跌就斷晒，點刨都斷，所以話買D好D既牌子。

牌子就好多，但多數都係原子筆，嘟喱筆，又好多人，真係想睇下都難，難得STAEDTLER分開左鉛筆同原子筆擺既地方，所以好順利慢慢揀。

原來鉛筆都分好多款，有環保型，三角型等等。。。。。媽咪一口氣買了$100，唔好以為買左好多，因為只係有19支，平均要成5蚊一支呢，媽咪話好貴，我都話好貴。。。。

問左個sales，話全部都係made in germany，同埋筆芯唔易斷的。。。希望啦

呢個有套既鉛筆，成$7蚊支，話好易擦，所以擦膠碎都少D喎

媽咪話未見過，只見過黃色，綠色夠晒特別，同埋係環保鉛筆，所以又買了。

連鉛筆都有limited edition，夠誇張吧！

所有鉛筆都可以係Staedtler既專門店購買。

灣仔利東街地下G33號 /10am-10pm

不得不介紹呢支鉛芯筆，我地呢D小朋友，因為寫字大力，所以用唔到鉛芯筆，好易斷，但呢支鉛芯筆係標榜不易斷，買完返去，真係唔斷喎，大家可以試下。書展價：$27，logon價：$32

2016書展篇

2016書包篇

2016書展--書包篇

9月就要升上小一了~終於可以有自己既靚書包，究竟咁多隻書包邊款好D呢？媽咪話去書展應該多D款可以揀，呢個都係我今次點解出現係書展既目的同原因，話要真正試上身先知自己需要咩野，唔係睇一兩頁簡介就決定喎。

書包真係有好多牌子，SPI, impact, beckmann, lego, moonrock, oxford university, Millie, Tiger family, Dr Kong, FX creations.....等等

都係由於媽咪無做功課，所以我只揾到SPI, Dr Kong, beckmann, Millie, Tiger Family, 最後在Tiger Family買到書包了。

SPI ﹣ 我由幼稚園N班已經係用呢個牌子，學校規定跟學校買的。呢個牌子亦都係媽咪第一次接觸咩叫護脊書包。唔好處係好重，同埋唔知仲咩用得一年左右就會有一點點發霉，呢個係媽咪最唔like既。

Dr Kong ﹣ 媽咪話唔鐘意Dr Kong，無得解，只見＄2XX一個，拎上手都無試，媽咪就走了。

Beckmann ﹣ 一早聽過佢個大名，書展買同出面買一樣9折，唔明迫黎仲乜，折左都成$8xx，早前係門市試過，拎上手好重，同埋都好長咁，我細粒，背上身好似好好笑咁，入面有塊鋁片，媽咪仲問人係唔係可以當車拉，低B問題就唔好問啦，個鋁片係護脊架，但因為貴同重，媽咪無買到，但D款真係幾靚的。

Millie ﹣ 就咁望我以為係Beckmann呢，個款好似呀，但平好多，無記錯好似係$5XX，但我真係唔鍾意個扣扣起心口

Tiger Family ﹣ 標榜係有同理工大學科研合作的護脊書包。背脊有一塊有孤度透氣的膠板，而背後有非常厚實又透氣海棉，可以整個腰椎保護好好的，而且沒用我最唔鍾意既胸扣，雖然男女款夾埋只有4個色，而家公仔上一定唔夠靚，但因為夠平，折完只是$460，所以媽咪就叫我買了。

2016文具篇

2016書展篇

2016 迫．迫．迫行書展

今日媽咪帶左去我書展，我從來都未行過，媽咪話要行好耐，會好倦，好多人，好迫，聽到都怕怕！但媽咪話一定要同我去，因為係去試下書包喎。

去書展聽到好多人會買練習比D小朋友做，而我媽咪係唔會既，佢話今次最主要入去係買書包同文具，媽咪話唔會迫我做練習，最更要快樂學習，太好了！！！

今次書展用左成千幾蚊，媽咪肉都赤埋，話次次去都無用到咁多＄，係第一次用咁多＄，究竟我地買左D乜，一於去片!!!!!

一開始就直上三樓，因為三樓先係兒童天地，有兒童書同文具 hall，入到去其實都唔係咁多人，係有少少迫，但都睇到野。媽咪只係知道3樓有佢想要既野，但完全唔知係邊區，完全無做功課，呢到咁大咪有排行？？？？？？？

一路行一路行，見到本好得意既pop-up書，每一頁都有一好大既pop-up，之後仲有其他機關，好得意，只係$80，媽咪見咁得意就買左返黎囉，本書其實係講D咩架，咁多英文，見到有Fairy囉，應該係D仙子呀，公主呀咁囉~~~

跟本我見到媽咪對眼發左光咁，原來之前佢想買一本叫《大偵探福爾摩斯》，佢話之前見過內頁覺得幾好，中文既詞語有特別highlight左，又有解釋，可以學下中文喎，但一D都唔平呀，成50蚊本，跟住佢就話買2本，英文版又買一本，突然佢叫我一本都唔好買，因為佢發覺原來個《大偵探福爾摩斯》係連載左係一本既兒童的科學既月刊入面，佢話訂月刊開心D，所以就去訂啦。

個月刊分左兒童的科學平裝版，同禮品版，禮品版係可以整埋個期書所講既其中一個科學實驗，但成$70蚊本，媽咪話好貴，我又太細個唔會明白，所以買平裝算。睇睇下兒童的科學又見到一本叫兒童的學習既？兒童的學習就係連載左《大偵探福爾摩斯》既英文版，媽咪又話兒童的學習好D，有英文有中文，又唔止淨係學科學，又轉去訂兒童的學習.......媽咪！究竟你想點架，一時一樣~~~~~

兒童的學習半年6期 $199
兒童的學習一年12期 $360
仲可以用$10購買返之前既期數，都ok卦~~~~

再行行行，見到有AEON姨姨撩人出信用卡，填左就有一本DRMAX既Disney故事書，都好厚好大本，媽咪二話不說就去登記了，話自己有AEON卡，去吉之島買野就唔使下下要等爸B喎。